УИХ-ын Эдийн засгийн байнгын хороо өнөөдөр (2026.07.01) 53.1 хувийн ирц бүрдсэнээр хуралдаж, таван асуудал хэлэлцэж шийдвэрлэв. Монголбанкны Тэргүүн дэд ерөнхийлөгчид нэр дэвшигчийн сонсголын тайланг хэлэлцлээ. (Сонсголын талаарх мэдээллийг эндээс)
Тус байнгын хорооноос энэ сарын 30-нд зохион байгуулсан сонсголд оролцогч, ажиглагчаар нийт 16 иргэн бүртгүүлж, 27 гишүүн оролцсон. Иргэн Л.Амар, Д.Баасандорж, М.Будбазар, О.Галцог, Б.Зоригтбаяр, Г.Хонгор, Г.Эрдэнэмөнх нар нэр дэвшигчээс асууж, хариулт авсан. Монгол Улсын Их Хурлын чуулганы хуралдааны дэгийн тухай хуулийн 133 дугаар зүйлийн 133.1 дэх хэсэгт заасны дагуу сонсголд оролцсон гишүүд хаалттай хуралдаж, сонсголын тайланг гаргасан гэж УИХ-ын гишүүн Л.Соронзонболд танилцууллаа. Тайланг хэлэлцэх үед, Монголбанкны Ерөнхийлөгч С.Наранцогт Монголбанкны Тэргүүн дэд ерөнхийлөгчөөр Энхболдын Анарыг томилуулах саналыг өргөн мэдүүлсэнээ илтгэсэн юм. (Нэр дэвшигчийн намтрыг эндээс)
Хэлэлцэж буй асуудалтай холбогдуулан УИХ-ын гишүүн Дав.Цогтбаатар, Г.Очирбат, М.Мандхай нар асууж, үг хэллээ. Гишүүдийн асуултад Монголбанкны Ерөнхийлөгч болон нэр дэвшигч хариулахдаа, төв банкнаас явуулж буй мөнгөний бодлого, хяналт, шалгалтын үр дүнг ирүүлэх зэрэг асуудлыг хөндсөн юм. Ийн хэлэлцээд, Энхболдын Анарыг Монголбанкны Тэргүүн дэд ерөнхийлөгчид томилуулах талаар санал хураахад хуралдаанд оролцсон гишүүдийн 75 хувь нь дэмжив. Уг асуудлаар Эдийн засгийн байнгын хороо санал, дүгнэлт, УИХ-ын тогтоолын төслийг чуулганы нэгдсэн хуралдаанд танилцуулахаар боллоо.
Байнгын хорооны хуралдаанаар үргэлжлүүлэн “Эрчим хүчний салбарын тогтвортой байдал, хэвийн үйл ажиллагааг хангах чиглэлээр авах арга хэмжээний тухай” УИХ-ын тогтоолын төслийг хэлэлцсэн. Тогтоолын төслийг хэлэлцэх үед эрчим хүч тасалдуулахгүй байх, салбарынхны цалин хөлсийг нэмэх, өвөлжилтийн бэлтгэлийн талаар УИХ-ын гишүүн Л.Соронзонболд, А.Ундраа, С.Цэнгүүн, Н.Батсүмбэрэл, Ч.Анар, Х.Булгантуяа, П.Батчимэг, Р.Батболд, С.Эрдэнэбат нар тодруулж, байр сууриа илэрхийллээ.
Хөдөлмөрийн үнэ цэнийг өсгөх нь салбарын бодлогын нэг хэсэг, цалинг хэмжээг хэсэгчилсэн байдлаар нэмэхээр төлөвлөсөн хэмээн Монгол Улсын Засгийн газрын гишүүн, Эрчим хүчний сайд Б.Найдалаа хариулсан.
Энэ өдрийн хуралдаанаар Газрын тосны тухай хуульд өөрчлөлт оруулах тухай хуулийн төсөл, Эдийн засгийн эрх чөлөөний тухай хуулийн төсөл, Ашигт малтмалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийн эцсийн хэлэлцүүлгийг хийв. Байнгын хороо хуулийн төслүүдийг хэлэлцэх үед УИХ-ын гишүүн Г.Уянгахишиг, Г.Очирбат, Б.Жаргалан, Б.Мөнхсоёл, С.Эрдэнэбат, Ш.Бямбасүрэн нар төслийн үр дүн, хэрэгжиж эхлэх хугацааг онцлон тодруулсан. Хуулийн төслүүдээр Ажлын хэсэг, гишүүдээс гаргасан зарчмын зөрүүтэй саналын томьёоллуудаар санал хурааж, санал, дүгнэлтийг нэгдсэн хуралдаанд танилцуулахаар тогтов гэж Улсын Их Хурлын Хэвлэл мэдээлэл, олон нийттэй харилцах газраас мэдээллээ.
Сэтгэгдэл үлдээх