“Гоодойн ам”-д гарсан түймрийг унтраажээ

2019-04-15 98 0

СБД-ийн 19 дүгээр хороо “Гоодойн ам”-д шар өвс шатаасны улмаас түймэр гарлаа гэсэн дуудлага нийслэлийн Онцгой байдлын газарт өчигдөр 13:55 цагт  ирсэн байна.

Дуудлагын дагуу Гал түймэр унтраах, аврах 34, 74, 10, 26, 18 дугаар анги болон нийслэлийн Аврах анги 105-ын нийт 102 алба хаагч,  12 техник хэрэгсэлтэй ажиллан, түймрийг цурманд оруулан бүрэн унтраажээ.

Хаврын хуурайшилтын улирал эхлэж, байгаль орчин, иргэдийн амь нас, эрүүл мэнд, эд хөрөнгөд аюул учруулахуйц гал түймрийн осол гамшгийн дуудлагын тоо, давтамж нэмэгдэж, гал гарах явдал ихсэж байгаа тул  Нийслэлийн Засаг даргын Тамгын газар уриалга гаргалаа.

Уриалгад, “Хуурайшлын улирал дуустал аялал зугаалгаар ой хээр, уулын бүсэд явахгүй байх, зайлшгүй явсан тохиолдолд ил гал гаргахгүй байх

– Ойн бүс бүхий орчинд тамхи татахгүй байх

– Гал гарах нөхцөлийг үүсгэж болзошгүй үнс нурам, хог хаягдлыг  бүрэн унтраалгүй хогийн цэгт хаяхгүй байх

– Гэр орондоо зул, хүж асаахдаа галын аюулгүй байдлыг хангаж, хяналтгүй орхихгүй байх

– Цахилгаан хэрэгсэл ашиглалтын дүрэм журмыг сайтар мөрдөж, эвдрэл гэмтэлтэй, зориулалтын бус цахилгаан хэрэгсэл ашиглахгүй байх

– Бага насны хүүхдийг харж асрах хүнгүйгээр гэрт нь орхихгүй байх зэргээр хүний хүчин зүйлээс хамааралтай галын аюул гамшгаас урьдчилан сэргийлэх бүхий л арга хэмжээг авч, гал түймрийн осол гамшгаас сэрэмжлэхийг нийт иргэддээ уриалж байна” гэжээ.

Холбоотой мэдээ